Author: Admin
ភ្នំពេញ ៖ លោក ហ៊ុយវណ្ណៈ រដ្ឋលេខាធិការ ទីស្តីគណៈរដ្ឋមន្រ្តី និងជា ប្រធានសហភាពសហព័ន្ធអ្នកសារព័ត៌មានកម្ពុជា(ស.ស.ស.ក)កាលពីព្រឹកថ្ងៃទី៣ ខែធ្នូ ឆ្នាំ២០២៤ បានបង្ហោះលើផេកផ្លូវការរបស់លោកថា ៖ «ខ្ញុំសូមអំពាវនាវដល់ អ្នកច្បាប់ តុលាការគ្រប់ជាន់ថ្នាក់យក «ច្បាប់ស្តីពីរបបសារព័ត៌មាន» ធ្វើជាមូលដ្ឋានសម្រាប់ការដោះស្រាយចំពោះករណីអ្នកសារព័ត៌មាន ។ លោក ហ៊ុយ វណ្ណៈ បន្តថា ៖ សូមជូនបងប្អូន អ្នកកាសែត អ្នកសារព័ត៌មាន ជាទីរាប់អាន ក្នុងករណីដែល បងប្អូន មានក្តីក្តាំនៅតុលាការ គួរស្វែងរកការពិគ្រោះយោបល់ជាមួយ សមាគមកាសែតនិងមេធាវីដើម្បីទទួលបានមតិយោបល់ សម្រាប់ជាមូលដ្ឋានយកទៅដោះស្រាយការចោទប្រកាន់នានា ស្របតាមទិដ្ឋភាពច្បាប់ និងសន្តិវិធី។« ជាមួយគ្នានេះ សារជាថ្មីម្តងទៀត ខ្ញុំសូមអំពាវនាវដល់ អ្នកច្បាប់ តុលាការគ្រប់ជាន់ថ្នាក់ យកច្បាប់ស្តីពីរបបសារព័ត៌មាន» ធ្វើជាមូលដ្ឋានសម្រាប់ការដោះស្រាយចំពោះករណីអ្នកកាសែត អ្នកសារព័ត៌មាន»។ យើងត្រូវហ៊ានទទួលស្គាល់ថា បញ្ហាអយុត្តិធម៌សង្គមខ្លះដែលមិនត្រូវបានអើពើ គឺប្រជាជនពិតជាគ្មានជម្រើសអ្វីក្រៅតែពឹងអ្នកកាសែតឱ្យជួយផ្សាយ ដើម្បីបានជ្រាបដល់ថ្នាក់ដឹកនាំជាតិរបស់យើង។ យើងមិនចង់ឃើញបរិយាកាសមួយនៃការប្រើប្រាស់ច្បាប់ បម្រើឱ្យគោលដៅ បិទមាត់ បិទភ្នែក បិទត្រចៀក អ្នកសារព័ត៌មាននោះទេ។ ច្បាប់ប់ស្តីពីរបបសារព័ត៌មាន មិនត្រូវបានប្រើប្រាស់ចំពោះករណី អ្នកកាសែត អ្នកសារព័ត៌មាន តើចាំបាច់បង្កើតច្បាប់នេះមកធ្វើអ្វី? ដោយសេចក្តីស្រឡាញ់រាប់រាននិងដើម្បីសង្គមកម្ពុជា មានសុខដុមរមនា៕
ខេត្តបន្ទាយមានជ័យ៖ កមសមត្ថកិច្ចនគរបាលខេត្តបនបញ្ចុនជនសង្ស័យជនជាតិថៃចំនន១០នាក់និងវត្ថុតាងគ្រឿងញៀនជាង១ម៉ឺនគ្រាប់ត្រូវបានទៅសាលាដំបូងខេត្តកាលពីថ្ងៃទី៣ ធ្នូឆ្នាំ២០២៥ដើម្បីអនុវត្តតាមច្បាប់។សមត្ថកិច្ចបនឱ្យដឹងថាកម្លាំងនគរបាលជំនាញខេត្តបានចាប់និងបញ្ជូនជនជាតិថៃប្រុសស្រីចំនួន១០នាក់ទៅតុលាករខេត្តបន្ទាយមានជ័យជាមួយនឹងសារធាតុញៀនជាច្រើនមុខសរុបចំនួនជាង១ម៉ឺនគ្រាប់។ លោកវរសេនីយ៍ទោព្រហ្ម ពិសិដ្ឋ អធិការនគរបាលក្រុងប៉ោយប៉ែតបានឱ្យដឹងថា អនុវត្តតាមផែនការណែនាំនិងបញ្ជាដោយផ្ទាល់ក្នុងការបង្ក្រាបបទល្មើសនានា ជាពិសេសបទល្មើសគ្រឿងញៀនកាលពីយប់ថ្ងៃទី៣០ វិច្ឆិកា ២០២៤កម្លាំងផ្នែកប្រឆាំងគ្រឿងញៀននៃអធិការដ្ឋានបានសហការជាមួយកម្លាំងប៉ុស្តិ៍នគរបាលរដ្ឋបាលអូរជ្រៅបាន ចុះល្បាតក្នុងភូមិសាស្ត្ររហូតដល់ចំណុចអគារថ្មី ស្ថិតនៅភូមិអូរជ្រៅ សង្កាត់អូរជ្រៅបានឈានដល់ការបង្រ្កាបនូវបទល្មើសរក្សាទុក ចែកចាយនិងប្រើប្រាស់ដោយខុសច្បាប់នូវសារធាតុញៀនដោយឃាត់ខ្លួនបានជនជាតិថៃប្រុសស្រីចំនួន១០នាក់រួមមាន៖ពួកគេមានអាយុពី១៧ដល់៤៣ឆ្នាំស្នាក់នៅបណ្តោះអាសន្នក្នុងភូមិបាលិលេយ្យ២ សង្កាត់អូរជ្រៅ ក្រុងប៉ោយប៉ែត ។ ជាមួយនឹងការឃាត់ខ្លួនជនជាតិថៃនេះសមត្ថកិច្ចបានឆែកឆេររកឃើញនូវវត្ថុតាងសារធាតុញៀនជាច្រើនប្រភេទរួមមាន-ថ្នាំគ្រាប់ពណ៌ក្រហមមានអក្សរ(WY)ពីលើចំនួន(៩៥៨០គ្រាប់)-ថ្នាំគ្រាប់ពណ៌ទឹកក្រូចមានអក្សរ(WY)ពីលើចំនួន(១១៣០គ្រាប់)-ថ្នាំគ្រាប់ពណ៌បៃតងមានអក្សរ(WY)ពីលើចំនួន(៣៨គ្រាប់)-ម្សៅក្រាមសថ្លាសង្ស័យជាសារធាតុញៀនចំនួន២៦ថង់-លិខិតឆ្លងដែនចំនួនពីរក្បាល។-.អត្តសញ្ញាណបណ្ណសញ្ជាតិថៃចំនួន២សន្លឹក-ជញ្ជីងសម្រាប់ថ្លឹងគ្រឿងញៀនចំនួន៣គ្រឿង-ទូរស័ព្ទដៃ៦គ្រឿង។ លោកឧត្តមសេនីយ៍ត្រី ធិន សុិនដេត ស្នងការរងទទួលផែនប្រឆាំងបទល្មើសគ្រឿងញៀននៃស្នងការដ្ឋាននគរបាលខេត្តបន្ទាយមានជ័យបានឱ្យដឹងថាក្រោយពីខាត់ខ្ួនក្រុមផ្លើសចនជាតិថៃរួចមកផ្នែកជំនាញបានកសាងសំណុំរឿងបញ្ជូនជនសង្ស័យទាំង១០នាក់និងវត្ថុតាងទៅសាលាដំបូងខេត្តដើម្បីអនុវត្តតាមច្បាប់៕
ភ្នំពេញ៖ កម្លាំងអាជ្ញាធរបណចុះបង្រ្កាបទីតាំងបើកល្បែងឡូតូលួចលាក់ មួយកន្លែងដកហូតវត្ថុតាងជាច្រើន ។ប្រតិបត្តិការនេះបានធ្វើឡើង ស្ថិតក្នុងភូមិដំណាក់ធំ៣ សង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញកាលពីរសៀលថ្ងៃទី១ ខែធ្នូ ឆ្នាំ២០២៥។ ការចុះបង្ក្រាបនេះដោយមានការចង្អុលបង្ហាញពីលោក សេង គន្ធ អភិបាលខណ្ឌមានជ័យ និងជាប្រធានគណៈបញ្ជាការឯកភាពខណ្ឌបានបញ្ជាឲ្យលោកចៅសង្កាត់ស្ទឹងមានជ័យទី៣ នាយប៉ុស្តិ៍ និងកម្លាំងសណ្តាប់ធ្នាប់ខណ្ឌដឹកនាំកម្លាំងចុះបង្រ្កាបទីតាំងល្បែងឡូតូ នៅភូមិដំណាក់ធំ៣ សង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ ។ ក្នុងការបង្ក្រាបសមយ្ថកិច្ចបានដកហូតសម្ភារបទល្មើសមួយចំនួនដូចជា៖-កុំព្យូទ័រ២គ្រឿង-ម៉ាស៊ីនព្រីនតូច ២គ្រឿងសម្ភារពាក់ព័ន្ធនឹងល្បែងឡូតូខាងលើ ត្រូវបានកម្លាំងគណៈបញ្ជាការឯកភាពរដ្ឋបាលខណ្ឌមានជ័យ យកទៅរក្សាទុក នៅសាលាខណ្ឌមានជ័យជាបណ្ដោះអាសន្ន ចំណែកមនុស្សបានរត់ប្រសាចគេចខ្លួនបាត់អស់ ៕
ភ្នំពេញ៖ ក្រសួងធនធានទឹក និងឧតុនិយមព្រឹកថ្ងៃចន្ទទី២ ខែធ្នូ ឆ្នាំ២០២៥នេះ បានចេញសេចក្ដីជូនដំណឹងស្តីពីស្ថានភាពធាតុអាកាសនៅព្រះរាជាណាចក្រកម្ពុជា សម្រាប់ថ្ងៃទី២ ខែធ្នូ។ ពេលខ្យល់មូសុងឦសាន នៅតែមានឥទ្ធិពលខ្លាំងសម្ពាធទាបដែលគ្របដណ្តប់លើ សមុទ្រចិនខាងត្បូង ឈូងសមុទ្រថៃ ភាគខាងក្រោមនៃអាងទន្លេមេគង្គលើព្រះរាជាណាចក្រ កម្ពុជាបានថយឥទ្ធិពល។ សេចក្តីជូនដំណឹងបានបញ្ជាក់ទៀតថា ស្ថានភាពបែបនេះនឹងធ្វើឱ្យ៖ចាប់ពីថ្ងៃទី២ ដល់ថ្ងៃទី៤ ខែធ្នូ ឆ្នាំ២០២៥ ១-តំបន់វាលទំនាប៖សីតុណ្ហភាពមធ្យមអប្បបរមា២០°C និងសីតុណ្ហភាពមធ្យមអតិបរមា៣១°C។ ខ្យល់បក់ មកពីទិសឦសាន និងបូព៌មានល្បឿនមធ្យម៣ ម៉ែត្រ វិនាទី។ ២-តំបន់ខ្ពង់រាប៖សីតុណ្ហភាពមធ្យមអប្បបរមា១៩°C និងសីតុណ្ហភាពមធ្យមអតិបរមា៣០°C។ ខ្យល់បក់មកពីទិសឦសាន និងបូព៌មានល្បឿនមធ្យម៤ម៉ែត្រ/វិនាទី។ ៣-តំបន់មាត់សមុទ្រ៖-សីតុណ្ហភាពមធ្យមអប្បបរមា២០°C និងសីតុណ្ហភាពមធ្យមអតិបរមា៣០°C។ ខ្យល់បក់ មកពីទិសឦសាន និងអាគ្នេយ៍ មានល្បឿនមធ្យម៣,៥ម៉ែត្រ វិនាទី។ -រលកសមុទ្រមានកម្ពស់មធ្យមអប្បបរមា០,៥០ម៉ែត្រនិងកម្ពស់មធ្យមអតិបរមា១,២៥ម៉ែត្រ៕
ភ្នំពេញ៖បន្ទាប់ពីអាវុធហត្ថរាជធានីភ្នំពេញ បានបើកយុទ្ធនាការក្តៅ បង្ក្រាបក្រុមក្មេងទំនើង កាលពីថ្ងៃទី ២១ខែមិថុនា ឆ្នាំ២០២៤កន្លងទៅ ជាបន្តបន្ទាប់មក មានក្មេងទំនើងជាច្រើនរយនាក់ត្រូវបានបង្ក្រាប ក្រោមវិធានការអប់រំ ដាក់វិន័យរដ្ឋបាល និងបញ្ជូនទៅតុលាការ រហូតទទួលបានការគាំទ្រនិងសាទរ ពីប្រជាពលរដ្ឋ។ ក្រោយការស្ងប់ស្ងាត់មួយរយៈ កម្លាំងអាវុធហត្ថរាជធានីភ្នំពេញ ប្រមាណ ២០០នាក់ បានបើកយុទ្ធនាការចុះបង្ក្រាបក្មេងទំនើងទ្រង់ទ្រាយធំជាលើកទី២ទៀតុំបន្ទាប់ពីបានឃាត់ខ្លួនក្មេងទំនើងវាយគ្នាទៅវិញទៅមក ចំនួន ៥នាក់ និងបញ្ជូនទៅតុលាការ កាលពីថ្ងៃទី២៥ ខែវិច្ឆិកា ដើម្បីផ្តន្ទាទោសដាក់ពន្ធនាគារ និងឃាត់ក្មេងទំនើងបង្ហោះម៉ូតូ ៥នាក់ផ្សេងទៀត នៅយប់ថ្ងៃទី៣០ ខែវិច្ឆិកា ឈានចូលថ្ងៃទី១ ខែធ្នូ ឆ្នាំ២០២៥ យកទៅអប់រំ ដាក់វិន័យរដ្ឋបាល ព្រមទាំងដកហូតម៉ូតូ ៣គ្រឿង រក្សាទុ៣ខែ។ តែក្នុងនោះមានម៉ូតូ០១គ្រឿង នឹងត្រូវរក្សាទុករហូតដល់៦ខែ ព្រោះធ្លាប់ត្រូវបានអាវុធហត្ថភ្នំពេញ ឃាត់រក្សាទុក៣ខែម្តងរួចមកហើយ ក្រៅពីនេះអាវុធហត្ថរាជធានីភ្នំពេញ ក៏បានអប់រំនៅនឹងកន្លែង ចំពោះក្មេងៗប្រមាណ៧០នាក់តាមគោលដៅផ្សេងៗ ដែលបានប្រមូលផ្តុំគ្នាកណ្តាលអាធ្រាតមិនចូលផ្ទះ ផឹកស្រា ជក់វែប នៅទីសាធារណៈយ៉ាងអនាធិបតេយ្យ។ សូមរំលឹកថា កន្លងតៅ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានដាក់បទបញ្ជាដ៏ម៉ឺងម៉ាត់ ពាក់ព័ន្ធនឹងក្មេងទំនើង ដោយត្រូវអនុវត្តគ្រប់វិធានការឲ្យបានតឹងរឹងបំផុត ទាំងវិធានការរដ្ឋបាល និងវិធានការច្បាប់ ដោយឡែកចំពោះក្មេងទំនើងបង្ហោះម៉ូតូនៅតាមដងផ្លូវសាធារណៈ ត្រូវឃាត់ម៉ូតូរក្សារទុករយៈពេលបីខែចំពោះការប្រព្រឹត្តលើកទីមួយ និងប្រាំមួយខែប្រសិនបើមិនរាងចាល នៅតែប្រព្រឹត្តលើកទីពីរបន្តទៀត៕
ខេត្តសៀមរាប៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បន្ទាប់ពីបានចូលរួមកម្មវិធីរត់ប្រណាំងអន្តរជាតិពាក់កណ្ដាលម៉ារ៉ាតុងអង្គរវត្តលើកទី ២៩ នៅថ្ងៃទី១ ខែធ្នូ ឆ្នាំ២០២៥នើមក សម្ដេច បានឆ្លៀតឱកាសចុះពិនិត្យស្ថានភាព និងទស្សនាសហគមន៍ទេសចរណ៍ធម្មជាតិកំពង់ភ្លុក ស្រុកប្រាសាទបាគង ខេត្តសៀមរាប ។ សម្ដេចធិបតីបានថ្លែងបញ្ជាក់ថា សហគមន៍ទេសចរណ៍ធម្មជាតិកំពង់ភ្លុក ជាទីកន្លែងផ្តល់នូវទស្សនីយភាពបែបធម្មជាតិនៃការរស់នៅរបស់បងប្អូនប្រជាជនខ្មែរតាមបែបបទអ្នកទន្លេ និងសម្រស់ធម្មជាតិសម្បូរបែបរបស់បឹងទន្លេសាបផងដែរ។ ជាមួយគ្នានេះ បន្ទាប់ពីបានទស្សនកិច្ច និងជួបសំណេះសំណាលផ្ទាល់ជាមួយសហគមន៍ ពិសេសអ្នកប្រកបរបរជាអ្នកបេីកបរកាណូត និងអុំទូកបម្រេីសេវាជូនអ្នកទេសចរ សម្ដេចធិបតី ទទួលបាននូវសំណូមពរមួយចំនួន ហេីយសម្រេចផ្តល់ជាដំណោះស្រាយជូនដូចខាងក្រោម៖ ១.កសាងផ្លូវកៅស៊ូ៨គីឡូម៉ែត្រ លើផ្លូវក្រាលគ្រួសក្រហមដែលមានស្រាប់ ដេីម្បីផ្តល់ភាពងាយស្រួលក្នុងការធ្វើដំណើរ និងកាត់បន្ថយការហុយ។២. កសាងបញ្ជរលក់សំបុត្រថ្មីរបស់សហគមន៍ ដែលនឹងជួយឱ្យសហគមន៍មិនចាំបាច់ជួលដីដើម្បីលក់សំបុត្រដូចបច្ចុប្បន្នុ។៣. ផ្តល់បន្ថែមនូវធុងសំរាមក្នុងសហគមន៍ដើម្បីថែរក្សាអនាម័យ និងបរិស្ថាន នៅក្នុងតំបន់។ បន្ថែមពីនេះ សម្ដេចធិបតី ហ៊ុន ម៉ាណែត ក៏កោតសរសើរចំពោះបងប្អូនប្រជាពលរដ្ឋនៅកំពុងភ្លុក ដែលបានរួមគ្នាចងក្រងជាសហគមន៍ ដើម្បីផ្តល់ជូននូវសេវាកម្មយ៉ាងល្អជូនភ្ញៀវទេសចរជាតិ និងអន្តរជាតិ ប្រកបដោយស្នាមញញឹមនិងសប្បាយរីករាយ ជាពិសេសក៏រួមចំណែកក្នុងការលេីកកម្ពស់ជីវភាពរស់នៅប្រចាំថ្ងៃ និងបង្កើតផលិតផលទេសចរណ៍បន្ថែមនៅក្នុងខេត្តសៀមរាប។៕
ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា អបអរសាទរ ខួបអនុស្សាវរីយ៍លើកទី៤៦ទិវាកំណើតរណសិរ្សសាមគ្គីអភិវឌ្ឍន៍មាតុភូមិកម្ពុជា២ធ្នូ ១៩៧៨ ~ ២ ធ្នូ ២០២៤។គួរបញ្ជាក់ថាថ្ងៃទី២ ខែធ្នូ ឆ្នាំ២០២៤នេះ គឺជាខួបទី៤៦ឆ្នាំនៃការបង្កើតរណសិរ្សសាមគ្គីសង្គ្រោះជាតិកម្ពុជា(១៩៧៨-២០២៤)នៅតំបន់រំដោះស្ថិត ក្នុងភូមិជើងឃ្លូ ឃុំ២ធ្នូ ស្រុកស្នួល ខេត្ដក្រចេះហើយក៏ជាចលនាប្រឆាំងកងទ័ពខ្មែរក្រហមនៃរបបកម្ពុជាប្រជាធិបតេយ្យ។ ចលនា២ធ្នូជាចលនាសាមគ្គីដែលត្រូវបានបង្កើតឡើងក្នុងស្ថានភាពដែលប្រទេសកម្ពុជាធ្លាក់ក្នុងគ្រោះមហន្តរាយធ្ងន់ធ្ងរនៃរបបខ្មែរក្រហម ក្រោមមេដឹកនាំជាន់ខ្ពស់របស់គណបក្សប្រជាជនកម្ពុជាបច្ចុប្បន្ន ដោយថ្នាក់ដឹកនាំទាំងនោះបង្កើតចលនាកម្លាំងទ័ពនិងបង្កើតបានជា «រណសិរ្សសាមគ្គីសង្គ្រោះជាតិកម្ពុជា» ដែលក្រោយមកបានប្តូរឈ្មោះជា «រណសិរ្សសាមគ្គីអភិវឌ្ឍន៍មាតុភូមិកម្ពុជា»។ ថ្នាក់ដឹកនាំទាំងនោះមានសម្ដេចមហាពញាចក្រី ហេង សំរិន សម្ដេចធម្មពោធិសាល ជា ស៊ីមសម្ដេចអគ្គមហាសេនាបតីតេជោ ហ៊ុន សែន ជាស្ថាបនិកដ៏សំខាន់និង វរជនស្នេហាជាតិជាច្រើនរូបទៀត។គេនៅចាំមិនភ្លេចទេថា កម្លាំងមហាសាមគ្គីរបស់ប្រជាជនកម្ពុជាគ្រប់ទិសទីបានក្រោកឈររួបរួមជាកម្លាំងនិងបានការឧបត្ថម្ភគាំទ្រយ៉ាងធំធេងពីប្រទេសមិត្តជិតឆ្ងាយ បានផ្ដួលរំលំរបបកម្ពុជាប្រជាធិបតេយ្យក្រោមការដឹកនាំរបស់មេផ្ដាច់ការប៉ុលពតហើយឈានដល់ទទួលបានជ័យជម្នះទាំងស្រុងនាថ្ងៃទី ៧ មករាឆ្នាំ ១៩៧៩។ ជ័យជំនះថ្ងៃ ៧ មករា ១៩៧៩ រហូតមកដល់សព្វថ្ងៃនេះ ធ្វើឱ្យកម្ពុជាមានការអភិវឌ្ឍរីកចម្រើនលើគ្រប់វិស័យ និងធ្វើឲ្យប្រជាជនកម្ពុជាចាំមិនភ្លេចឡើយ៕
ខេត្តពោធិ៍សាត់ ៖ កន្លងមកជនសង្ស័យជាមុខសញ្ញាធ្លាប់ប្រព្រឹត្ត្រល្មើសបទល្មើសនរសាទលួចឆក់ត្រីក្នុងកន្លែងអភិរក្សមេត្រីពូជចំនួន៥នាក់ បានព្រមប្រគល់ឧបករណ៍ឆក់ត្រីខុសច្បាប់ជូនសមត្ថកិច្ចនគរបាលប៉ុស្ដិ៍នគរបាលរដ្ឋបាលត្នោតជុំដើម្បីរក្សាទុក និងធ្វើការអប់រំកិច្ចសន្យាលាយលក្ខណ៍ជាអក្សរត្រឹមត្រូវ ហើយថ្ងៃមុខមិនមានករណីបែបនេះទៀតទេ។នេះបើតាមការបញ្ជាក់ពីសមត្ថកិច្ចនគរបាលប៉ុស្ដិ៍រដ្ឋបាលត្នោតជុំ នាល្ងាចថ្ងៃទី៣០ ខែវិច្ឆិកា ឆ្នាំ២០២៤។ ប្រភពព័ត៌មានពីមន្រ្តីនគរបាលប៉ុស្តិ៍ដដែលឲ្យដឹងទៀតថា ជនសង្ស័យជាមុខសញ្ញាឆក់ត្រីខាងលើ ត្រូវបានមន្ត្រីសហគមន៍នេសាទដងទឹកលាច និងកម្លាំងនគរបាលប៉ុស្ដិ៍រដ្ឋបាលត្នោតជុំ សហការចុះត្រួតពិនិត្យ ទប់ស្កាត់ និងបង្រ្កាប ជាក់ស្ដែងឃើញម៉ូតូចំនួន០៥គ្រឿង និងមានឧបករណ៍ឆក់ត្រីសំណាញ់ និងអាគុយ ដុំ និងដងឆក់)ត្រង់ចំណុចបឹងតាគោះស្ថិតក្នុងភូមិបឹងវាល ឃុំត្នោតជុំ ស្រុកក្រគរ ខេត្តពោធិ៍សាត់ ។ ប្រភពពីមន្រ្តីនគរបាលប៉ុស្តិ៍ដដែលបញ្ជាក់ទៀតថា ក្រោយមកកម្លាំងស្រាវជ្រាវរកឃើញជនសង្ស័យចំនួន៥នាក់ ១ ឈ្មោះ លីវ រឹម ភេទប្រុស អាយុ ៤៤ឆ្នាំ ជនជាតិខ្មែរ ទី- ឈ្មោះ ឡយ សុជាតិ ភេទប្រុស អាយុ ៣៦ឆ្នាំ ជនជាតិខ្មែរ ទី-៣ ឈ្មោះ ស៊ុន សាក់ ភេទប្រុស អាយុ ៣៤ឆ្នាំ ជនជាតិខ្មែរ ទី-៤ ឈ្មោះ លាប សេង ភេទប្រុស អាយុ ៣៤ឆ្នាំ ជនជាតិខ្មែរ និងទី-៥ ឈ្មោះ ពេជ ខ្លា ភេទប្រុអាយុ ៣០ឆ្នាំ ជនជាតិខ្មែរ បច្ចុប្បន្ន អ្នកទាំងចំនួន០៥នាក់ មានទីលំនៅ ភូមិបឹងវាល ឃុំត្នោតជុំ ស្រុកក្រគរ ខេត្តពោធិ៍សាត់ ។ ប្រភពព័ត៌មានបញ្ជាក់បន្ថែមថា បច្ចុប្បន្ន ជនសង្ស័យ បានប្រគល់ទទួលដុំឆក់ត្រី(អាំងវុិចទ័រ)ជូនមន្រ្តីនគរបាលប៉ុស្ដិ៍រដ្ឋបាលត្នោតជុំរក្សាទុកបណ្ដោះអាសន្ន ចំណែកជនសង្ស័យ និងម៉ូតូបានប្រគល់ជូនជនសង្ស័យរៀងៗខ្លួន ដោយធ្វើកិច្ចសន្យាលាយលក្ខណ៍ជាអក្សរត្រឹមត្រូវ ពុំមានលើកក្រោយៗជាដាច់៕ខាត ៕
ភ្នំពេញ៖ គិតត្រឹមថ្ងៃនេះអង្គភាពសារព័ត៌មានសរុបចំនួនជិត២ពាន់អង្គភាពនិង២៦សមាគមសារព័ត៌មានដែលបានចុះបញ្ជីត្រឹមត្រូវនៅក្រសួងព័ត៌មាន។ជាមួយគ្នានោះក្រសួងក៏បានចេញបណ្ណសម្គាល់អ្នកសារព័ត៌មានបានចំនួនជាង៨ពាន់ បណ្ណ រួចហើយ ជូនដល់អ្នកសារព័ត៌មានសម្រាប់ប្រតិបត្តិការងារដោយស្របច្បាប់។ នេះបេីតាមការបញ្ជាក់ពីលោក ទេព អស្នារិទ្ធ អនុរដ្ឋលេខាធិការ និងជាអ្នកនាំពាក្យក្រសួងព័ត៌មាន បានប្រាប់ឱ្យដឹងកាលពីរសៀលថ្ងៃទី២៩ ខែវិច្ឆិកា ឆ្នាំ២០២៤។ អ្នកនាំពាក្យរូបនេះ បានបន្តថា ក្រសួងព័ត៌មាន ក្នុងឆមាសទី១ឆ្នាំ២០២៤ បានផ្តល់ការគាំពារផ្នែកច្បាប់ដល់អ្នកសារព័ត៌មានដែលបានចុះបញ្ជីត្រឹមត្រូវ ហើយបានជួបប្រទះនឹងបញ្ហាក្នុងពេលបំពេញការងារ ដោយក្រសួងបានសម្របសម្រួលស្វែងរកដំណោះស្រាយចំពោះវិវាទនិងបញ្ហានានា សរុបចំនួន ២០ករណី និងកំពុងជួយជ្រោមជ្រែងដល់ដំណើរការផ្តល់មេធាវីការពារក្តីក្នុងនីតិវិធីតុលាការលើ ករណីវិវាទមួយចំនួនទៀត។ក្នុងត្រីមាសទី៣ ឆ្នាំ២០២៤ ក្រសួងបានសម្របសម្រួលដោះស្រាយបណ្តឹងពាក់ព័ន្ធនឹងកំហុសវិជ្ជាជីវៈចំនួន១៧ករណី ដោយបានផ្តល់ការអប់រំនិងតម្រង់ទិសលើការប្រតិបត្តិក្រមសីលធម៌ និងនិយាមវិជ្ជាជីវៈសារព័ត៌មានជាធរមាន។ លោកទេព អស្នារិទ្ធបន្ថែមថា៖ កិច្ចគាំពារដល់អ្នកសារព័ត៌មានជាអាទិភាពចំបងមួយរបស់ក្រសួងព័ត៌មាន និងរាជរដ្ឋាភិបាលកម្ពុជា ដើម្បីផ្តល់ទំនុកចិត្តនិងការការពារដល់អ្នកសារព័ត៌មាន ដែលបានចុះបញ្ជីត្រឹមត្រូវគោរពតាមក្រមសីលធម៌វិជ្ជាជីវៈត្រឹមត្រូវ និងអនុវត្តតួនាទីនិងភារកិច្ចក្នុងក្របខ័ណ្ឌដែលច្បាប់កំណត់៕
ភ្នំពេញ៖ លោកឧត្តមសេនីយ៍ឯក ឌី វិជ្ជា អគ្គស្នងការរងនគរបាលជាតិ និងជាប្រធាននាយកដ្ឋានកណ្ដាលសន្តិសុខ កាលពីថ្ងៃទី២៩ ខែវិច្ឆិកា ឆ្នាំ២០២៤បានអំពាវនាវតាមរយៈបណ្ដាញសង្គមហ្វេសប៊ុកផ្លូវការរបស់លោកយ៉ាងដូច្នេះថា៖ សូមប្រជាពលរដ្ឋទាំងអស់កុំលក់ ឬផ្ដល់ព័ត៌មានផ្ទាល់ខ្លួន ឱ្យទៅជនអនាមិក បើមិនចង់ចាញ់បោក ឬផុងខ្លួនក្លាយជាជនល្មើសនៅថ្ងៃខាងមុខ។ ការអំពាវនាវបែបនេះរបស់លោកឧត្តមសេនីយ៍ឯក ឌី វិជ្ជា បន្ទាប់ពីលោកបានស្ដាប់រឿងពលរដ្ឋម្នាក់ជជែកពិគ្រោះយោបល់ក្នុងវិទ្យុABC រឿងមានអ្នកទាក់ទងទៅកូនរបស់ពលរដ្ឋ ហើយឱ្យយកលុយទៅបង់ថ្លៃម៉ូតូ ដែលលោក និងពលរដ្ឋដែលផ្ដល់យោបល់ក្នុងវិទ្យុថានេះជាករណីបោកប្រាស់។ លោកឧត្តមសេនីយ៍ឯក ឌី វិជ្ជា បានគូសបញ្ជាក់ថា« ខ្ញុំស្តាប់រួចគិតថាអាចនេះជាករណីបោកប្រាស់ហើយ ។ខណៈពេលនោះក៏មានបងប្អូនប្រជាពលរដ្ឋផ្សេងៗទៀតបានទូរសព្ទចូលនិយាយដូចខ្ញុំបានគិតដែរ។ សព្វថ្ងៃមានសកម្មភាពបោកប្រាស់គ្រប់រូបភាពដូចជាការទិញយកលេខលិខិតឆ្លងដែន ទិញលេខគណនីធនាគារទិញលេខអត្តសញ្ញាប័ណ្ណ ឬជាការថតយករូបរបស់យើង ដោយផ្ដល់មកវិញនូវថវិកាពី៥ម៉ឺនដល់២០ម៉ឺនរៀល។ បន្ថែមពីនេះ លោកឧត្តមសេនីយ៍ឯក ឌី វិជ្ជា សូមពុកម៉ែពូមីងបងប្អូនទាំងអស់មេត្តា កុំលក់ឬផ្ដល់នូវព័ត៌មានរបស់ខ្លួនយើងឱ្យទៅអ្នកដទៃឱ្យសោះ បើមិនដូច្នោះទេយើងនឹងធ្លាក់ក្នុងស្ថានភាពនៃបទល្មើសណាមួយនៅថ្ងៃខាងមុខមិនខាន។ ដូច្នេះបើបងប្អូនបានជួបនូវរឿងទាំងនេះ សូមមេត្តាទាក់ទងសមត្ថកិច្ចឬពិគ្រោះយោបល់ជាមួយអ្នកដែលយើងស្គាល់ជាមុនសិន មុននឹងសម្រេចចិត្តផ្ដល់នូវព័ត៌មានរបស់យើងឱ្យទៅនរណាម្នាក់។ ប៉ុន្តែបើសិនជាមិនច្បាស់ទេសូមកុំផ្ដល់ឱ្យតែម្តង៕