ភ្នំពេញ៖ គូស្នេហ៍ជិះម៉ូតូឌុបគ្នាដើរលេងខ្វះការប្រុងប្រយ័ត្នត្រង់ផ្លូវបំបែកជាបួនក៏ជ្រុលទៅបុករថយន្តតាក់ស៊ីម៉ាកម៉ាស្តាបណ្តាលឱ្យអ្នកទាំង២រងរបួសធ្ងន់។ ហេតុការណ៍នេះបានកើតឡើងវេលាម៉ោង១១យប់ ថ្ងៃទី២២ខែវិច្ឆិកាឆ្នាំ២០២៤ នៅក្រោយអតីតក្រសួងដែនដីផ្លូវលេខ៩៥ កែងផ្លូវលេខ៤៥៦ ក្នុងសង្កាត់បឹងត្របែក ខណ្ឌចំការមន ។
សាក្សីបានឱ្យដឹងថា មុនកេីតហេតុគេឃើញបុរសជាអ្នករត់តាក់ស៊ីម្នាក់បានបើករថយន្តម៉ាក ម៉ាស្តាផ្លាកលេខភ្នំពេញ 2BP-8629 ដឹកភ្ញៀវបរទេសម្នាក់ធ្វើដំណើរតាមផ្លូវលេខ៤៥៦ក្នុងទិសដៅពីកើតទៅលិច។ លុះមកដល់ចំណុចខាងលើត្រង់ផ្លូវបំបែកជាបួន ក៏ស្រាប់តែមានបុរសម្នាក់រួមដំណើរជាមួយនឹងនារីម្នាក់ត្រូវជាគូស្នេហ៍បានជិះម៉ូតូម៉ាក ហុងដាឃ្លីក ពណ៌សផ្លាស្លាកលេខ ភ្នំពេញ 1LC-1634 ជិះបោះពួយយ៉ាងលឿនតាមផ្លូវលេខ៩៥ពីជើងទៅត្បូងខ្វះការប្រុងប្រយ័ត្នក៏ជ្រុលទៅបុករថយន្តពីចំហៀងខាងស្តាំពេញទំហឹង បណ្តាលឱ្យអ្នកទាំង២ហោះផ្លោងទៅផ្លូវម្ខាងទៀតរងរបួសបាក់ភ្លៅខាងឆ្វេងទាំង២នាក់ ត្រូវបានដឹកតាមរថយន្តសាមុយយកទៅសង្គ្រោះនៅមន្ទីរពេទ្យមិត្តភាពខ្មែរ-សូវៀតហៅពេទ្យរុស្ស៊ី៕
ដោយឡែកខាងរថយន្តវិញរងការខូចខាតក្រពឹតទ្វារមុខចំហៀងខាងស្តាំបែកកង់មុខ តែមិនមានគ្រោះថ្នាក់ដល់មនុស្សដែលជិះក្នុងរថយន្តនោះទេ តែអ្នកបេីកបរត្រូវសមត្ថកិច្ចឃាត់ខ្លួនយកទៅប៉ុស្តិ៍រង់ចាំប្រគល់អោយផ្នែកជំនាញចរាចរណ៍ ។
ក្រោយពេលកេីតហេតុ រថយន្ដនិងម៉ូតូរួមទាំងអ្នកបេីកបរត្រូវសមត្ថកិច្ចជំនាញចរាចរណ៍ធ្វើការវាស់វែងយកទៅរក្សាទុកនៅការិយាល័យនគរបាលចរាចរណ៍ផ្លូវគោកដេីម្បីរង់ចាំដំណោះស្រាយ ៕
